باللهجة المحلية

"اللِّي خِلقْ عِلقْ!"

بيقولوا بْحسرة: "خْلقنا وعلقنا !"
والريح مش عَ هوى مراكبنا
أيامنا... أيام صعبة كتير كتيرْ
والشّر من كل النّواحي مْحاصرنا

إيش العمل والحياة مريرة؟
والعين بصيرة والإيد قصيرة!
والنفس بتسأل: "أنا شو مصيري؟"
قَوْلَكْ، في إيد قديرة تخلِّصنا؟

العيشِة كيف ممكن تكون هَنيِّة
والناس مضروبِة بالأنانية؟!
عايشين! آه متل وحوش البرية
من هالورطة مين يقدر ينشلنا؟

مهما تكون مآسينا أليمة
اليوم في إلنا بُشرى عظيمة
ولِدِلْنا المخلِّص رب المجْد
في المذود لَتَجسُّدوا معنى وْقيمة

بيكفينا الأمراض السرطانيِّة
والعنف والخيانات الزوجيِّة
وصراع أجناد الشّر الرّوحية
وفوقها القسوة وصقيع محبتنا!

كل الخليقَة أنينها مسموعْ
مين فيها مش حزنان ولا موجوع؟
واللِّي خِلِق علِق بوادي الدّموع
بسْ على عكس الرّجاء رجانا!

أيوب طلب الموت في آلامُو
وإرميا الباكي لعن أيّامُو
ومرار نُعمة من الّرب وأحكامُو!
واللّي أحياهم في الضيق يحيينا!

مهما تكون مآسينا أليمة
اليوم في إلنا بُشرى عظيمة
ولِدِلْنا المخلِّص رب المجْد
في المذود لَتَجسُّدوا معنى وْقيمة

ما بينفع نحط الحزن بالجرّة
ولا بالمنشار عقدتنا المُرّة
خلّينا نصبر للرّب هالمرَّة
وبْحينُو نفهم قصدُو ويواسينا

وعْدو إلنا ينسينا المشقاتْ
وأفكاره عّنا سلام وخيرات
ويصير وادي البكا ينبوع بركات
وبطرفة عين رحْ ينهي مآسينا!
إنسانّا الخارجي بيفنى ويزولْ
لكن الّداخلي بيتجدد عَ طول
والمنظور متل العشب للذبول
لَفوق.. لَغير المنظور عينينا

مهما تكون مآسينا أليمة
اليوم في إلنا بُشرى عظيمة
ولِدِلْنا المخلِّص رب المجْد
يْنير الخلود والعيشة الكريمة

"اللِّي خِلق عِلق" بأصعب ضيقة
بَسْ خلّينا نقول كل الحقيقة:
يسوعنا مات وقام في الحقيقة
وْهوِّي المسيح رجاء المجد فينا

من بعد الموت ما أرهب المصيرْ!
لَغير المؤمن الخاطي الشرير
عذابو للأبد بكا وْصرير
واحنا بدم المسيح كان تبريرنا

للأبد نفرح بالرب فادينا
في بيت الآب أروع مكان لينا
ميراثنا وأمجادنا تفوق الخيالْ
وروحُو ختْم وضمان ساكن فينا

مهما تكون مآسينا أليمة
اليوم في إلنا بُشرى عظيمة
ولِدِلْنا المخلِّص رب المجْد
مِنقدِّملو قْلوبنا وكل ترنيمة

• السابق
• التالي